20 zélnika 2006 rokù w Lëni miôł swój môl IV Zjôzd Kaszëbsczëch Spiéwôków. Jak to bëło chùtczi: http://www.naszekaszuby.pl/modules/news/article.php?storyid=530 i http://www.naszekaszuby.pl/modules/news/article.php?storyid=944&



Zéńdzenié rozpòczãło sã òd kaszëbsczi mszë swiãti intencji dzejarzów kaszëbsczi kùlturë lińsczi zemi: ks. Kanonika Bazylégò Òlãcczégò i Aleksandra Labùdë. Òdprawił jã ks. Probòszcz a kôzanié dôł ks. Zenon Pipka. Òbczas mszë gra lëńskô dãtô orkestra, spiéwôł chùr „Piãclëniô”. W czëtanié włącził sã môlowi part ZK-P i szkòłowé dzecë. Pò tim bëło przeszłé na plac. Całosc prowadzył direktor Gminnégò Dodomù Kùlturë, Edmùnd Szëmikòwsczi , przédnik chùru „Piãclëniô” z Lëni.
W dzélu òficjanym głos zabrôł Przédnik RKCH:
„Drësze, witóm Waji serdeczno na czwiôrtim ju Zjezdze Kaszëbsczich Spiéwôków.
Gôrsc historie. Ùdba pòspólnégò swiãtowaniô kaszëbsczi spiéwë wëszło òd karna chùrów PKP (Pierszi Kaszëbsczi Pasjë), zjisca sã nôprzódka w Lëzënie (Barłominie), dze gòspòdarzã bëła lëzyńskô „Lutnia”. Pò tim ùgòsca naju „Cassubia Cantat” w Parchòwie. W ùszłim rokù bëlë jesmë gòscama „Harmónie” w gardze Wejera. Przë leżnoscë zéńdzeniô na Zemi Bëtowsczi pòwsta Rada Kaszëbsczich Chùrów, chtërna pòstawia sobie wôżny cél: rozkòscérzanie kaszëbiznë przez spiéwanié. Nen cél zjiscywô, chòcle przez spiéwanié wspòmnióny Pasjë, ùdzél w Zjezdze Kaszëbów, nagranié na platkã Dziennika Bałtycczégò „Kaszëbi na Gòdë” czë dzysészé zetkanié.
Z rokù na rok karno kaszëbsczich spiéwôków rosce. W Wejrowie, do naszégò karna doszlë drësze z Dãbògòrzégò, Banina i Żukòwa, a w tim rokù rôczimë „Spiéwné Towarzéstwò miona Jana Trepczika” z Wejrowa.
Tą razą pòtkelë jesmë sã w Lëni, dze jesz wcyg kaszëbskô mòwa brzëmi. Na ti zemi dzejelë ks. Bazyli Òlęcczi i Aleksander Labùda- jich pamiãc chcemë terô ùtczëc sztótã cëszë.
Na przińdny rok òdwiedzymë Redã. A chto bądze gòspòdarzã za dwa lata dowiémë sã dzysô.
W tim môlu chcôłbëm pòdzãkòwac wszëtczima, chtërny dzejelë przë rëchtowanim tegò zjazdu. W całoscë drëchòwi Edmùndowi Szëmikòwsczémù, chtëren je dëszą tegò pòdjimù.
Drësze Kaszëbsczi Spiéwôcë!
Dzysô pòdsëmùjemë całi rok naszi robòtë. A bëła òna brzadnô. Z całą swiądą mòżemë rzec, że bëlno wpisëlë jesmë sã w Rok Kaszëbsczi, a do swiãtowaniô 50- lecô dzejaniô Kaszëbskò- Pòmòrsczégò Zrzeszeniô jesz swòje dorzucymë w gòdnikù. Ze zrzeszenim je nama pòde drogą. Swiôdczi ò tim patronat przédnika Artura Jabłońsczégò nad dzysészim swiãtã i pòmòc ze stronë môlowégò partu w Lëni. Za to dzãkùjemë i prosymë ò wiãcy! Dzãkùjã téż medioma: Radiu „Kaszëbë”, Dzennikòwi Bałtycczimù i naszi, regionalny telewizji.
Dzãkùjã téż za wspiarcé finansowé, chtërno dostele jesmë òd dobrzińców: samòrządzënë i firmów, ò jaczich gwës bądze dzysô rzekłé.
Ksądz Bazyli i Aleksander Labùda gwësno nick ni mielë bë procem, czejbë jem terô zabédowôł: Chcemë le so zażëc! Jô jesz do te dodóm: Chcemë tej jic dali wprzódk z kaszëbizną! Cassubia Cantat!”

Ò ksądzu Bazylim òpòwiedzôł przédnik partu ZK-P w Lëni, Łukôsz Jabłońsczi. Pòstacëjô Aleksandra Labùdë przedstawia jegò córka, Bògùsława Labùdda.
Na placu miona ks. Bazylégò Òlãcczégò wëstąpiałë chùrë:
- „Harmónia” z Żukòwa- dir. Witold Tréder (nowatorsczé òpracowanié przez dirigeńta kaszëbsczi spiéwë)
- „Chòranka” z Banina- dir. Urszula Hejmòwskô (Nowé, pòpùlarné piesnie z towarzenim elektronicznëch òrganów)
- „Mòrzanie” z Dãbògòrzégò- dir. Przemisłôw Stanisławsczi (klasyka kaszëbsczi spiéwë chùrowi, Trepczik w òpracowanim Mòwińsczégò plus „Żôle gąsôrczi” w ùkładze Szablewsczégò)
- „Lùtnia” z Lëzëna- dir. Tomasz Fópka (trzë kanonë z Taizé w kaszëbsczi wersji)
- „Spiéwné Towarzëstwò miona Jana Trepczika” z Wejrowa- dir. Zofia Kamińskô (dwa, trzë głosë a’capella z wseczëcym)
- „Piãclëniô”z Lëni- dir. Jan Szulc (òd Trepczika do Brahmsa)

Òbczas koncertów, w môlowim dodomie kùlturë mòżna bëło òbezdrzec snôżé wëstôwczi ò ks. Bazylim i kaszëbsczi wësziwk- wëstôwk wëżi-wojewódzczi.
Tédë ùczãstnicë przeszlë do szkòłë, dze zagra orkestra i zapiéwa Mónika Szulc, młodô lëńskô spiéwôczka.
Na stół pòstawiony òstôł bigos i jinszé smaczczi.
Rada Kaszëbsczich Chùrów zasadła na swim zéńdzenim.
1. przëjãté òstôł nowi nôleżnik Radë- Spiéwné Towarzéstwò miona Jana Trepczika z Wejrowa (w ùszłim rokù, w Wejrowie do karna Radë wëszłë chùrë: „Mòrzanie”, „Harmónia” z Żukòwa i „Chòranka”),
2. òstôł pòdsëmòwóny roczny cząd dzejaniô Radë i Zarządu(òd zélnika 2005 rokù). Zarząd pòtkôł sã rôz- 21 łżëkwiata 2006r. w Lëni.
- nagranié platczi „Kaszëbi na Gòdë II”
- współòrganizacjô II Kaszëbsczégò Festiwalu Mùzyczi Chùrowi i Regionalny w Żukòwie- 10.06.2006r. (gòspòdôrz- Chùr „Harmónia” z Żukòwa)
- współòrganizacjô VIII Zjazdu Kaszëbów w Gdini- 1 lëpińca 2006r.
- wspòłrganizacjô IV ZKS (gòspòdôrz- chùr Piãclëniô z Lëni)
- ùdzél w ùroczëstoscach roczëznowëch chùrów: „Harmónia” z Wejrowa, „Harmónia” z Żukòwa, „Cantores Veiherovienses” z Wejrowa i „Mòrzanie” z Dãbògòrzégò,
- ùfùndowanié nôdgrodë na Festiwalu „Kaszëbsczé Spiéwë” w Lëzënie za nôczëstszé jãzëkòwò wëkònanié piesni kaszëbsczi
- zlécenié rozpisaniô na chùrë piãcu piesni kaszëbsczich
3. przëjãcé Regùlaminu Dzejaniô Radë. Hewò òn:

Regùlamin dzejaniô Radë Kaszëbsczich Chùrów

1. Rada Kaszëbsczich Chùrów, dali zwónô Radą, je dobrowólną zrzeszą spiéwôków.
2. Òbjim dzejaniô Radë to całi swiat.
3. Nôwôżniészim célã Radë je rozwij kaszëbsczi kùlturë, w całoscë kaszëbsczégò jãzëka przez spiéw.
a) Dlôte Rada pòdjimô dzejania, chtërne temù służą, jak: òrganizacjô koncertów, nagraniów, wëdôwanié drëkã piesniów, pòdskôcanié do twòrzeniô nowëch dokazów, w tim téż wikszich formą òd piesnie.
b) Dlôte téż Rada współpracëje z jinyma òrganizacjoma, jistitucjoma, urzãdoma i utwórcoma kùlturë.
4. Przënôleżenié do Radë nie pòcygô za sobą płaceniô skłôdków.
5. Kadencjô Radë trwô 5 lat.
6. Rada przëjimô do swégò karna w drodze ùchwałë.
a) Pòstanowienia Radë są przëjimóné przez głosowanié, zwikłą wikszoscą głosów.
7. Nôleżnicë Radë (chùrë), delegùją do dzejaniô w Radze pò trzech przedstôwców kòżdi (w tim dirigeńta i przédnika chùru).
8. Rada wëbiérô ze swégò karna Przédnika i Zarząd.
9. Przédnik czerëje robòtą Radë i Zarządu i reprezentëje Radã w swiece.
10. Rada i Zarząd spòtikajã sã nié rzôdzy jak dwa razë w rokù.

4. Zwiãkszenié składu Zarządu ò nowëch nôleżników:
- Grażinã Jaworską- Żukòwò
- Bògùmiłã Ropel- Banino
- Wandã Krauze- Dãbògòrzé
- Henrika Bielecczégò- Wejrowò
5. Przëjãtô òsta ùdba dzejaniô Radë na przińdny, roczny cząd:
- współòrganizacjô V ZKS w Redze,
- nôdgrodë RKCH na kònkùrsach kaszëbsczi spiéwë,
- rôczenié nowëch nôleżników,
- robòta przë wëdaniém spiéwnika kaszëbsczich piesni na chùrë- przë leżnoscë Festiwalu Piesni ò Mòrzu w Wejrowie,
- coroczné achtnienié dzejarzów kaszëbsczi kùlturë w lëstopadnikù,
- ùdzél nôleżników RKCH w kaszëbsczich kùlturowëch pòdjmach w cządze rokù,
- Rada włączi sã w robòtã Radë Kaszëbsczégò Jãzëka w òbjimie kùlturë
- Przemisłôw Stanisławsczi przedstawił ùdbã dzélu artisticznégò Koncertu Jubileùszowégò z leżnoscë 50- lecô ZKP, 2 gòdnika 2006 rokù, na Òłowiance w Gduńskù- kaszëbsczé chùrë bądą spiéwac z orkestrą symfoniczną

Wanożną lutniã wëgra przédniczka „Mòrzanów” i to òni prawie mdą gòspòdôrzã ZKS za dwa lata!

Òbczas dzélu biesadnégò IV Zjôzdu Kaszëbsczich Spiéwôków pierszi rôz òstało pòspólno òdspiéwónëch czile nowëch, kaszëbsczich piesniów biesadnych. I kabarétowëch. Tekstë tuwò:
http://www.naszekaszuby.pl/modules/newbb/viewtopic.php?topic_id=88&forum=1&viewmode=flat&order=ASC&start=70

Patronatë wzãlë: Przédnik ZK-P. Artur Jabłońsczi, Radio Kaszëbë i Bôłtëcczi Dzénnik.
Do ùzdrzeniô i ùczëcô za rok w Redze!!!

Przédnik Radë Kaszëbsczich Chùrów
Tomasz Fópka