Drzéwiã kaszëbiznë

Kòrzeniska mòje w kaszëbsczim roscą piôskù
Sygóm w głãbią pò wòdã nima i spòkójnosc
W kòrunie mi wiater lëste szarpie ze złoscą,
Że jesz są zeloné, że wcyg tak je jich trójno...

Twéle są mòje dzyrsczé, zniesc są wiele w sztãdze
Niejeden zwiérz, chòc robôk pò nich mô wanogã
Nawetk, czej jómkã kùmô - mie to nick nie grãdzy
Sok, co w mich żëłach płënie ze zemi - wspòmôgô...

Dzéń z nocą zazérają miesącã i słuńcã
To sniég wietewczi zgëldzy, mróz scësnie, tej zelga
Ptôszków do spikù zybie spiéwanié bez kùńca
Tej sej deszcz kroplą wpadnie, co w ni jô sã przezdrzã...

Cëż ùzdrzã za lat setkã, czej na kraj dokroczã?
Bãdze wkrąg mie drzewné wòjskò stojec? Czë grobë
W zemiã wrosłé a na mie tôblëczkã òbôczã:
Nie rëszac! Je pòd òchróną! Pòmnik przirodë...

Tómk Fópka, Chwaszczëno, 3 maja 2011 rokù, gòdz. 9.58

----------------
"Pòjmë w przódk z kaszëbizną!"- J. Trepczik- www.fopke.pl