Von Hagens won!

Zwónk do dwiérzi! Òtmikóm. Stoji człowiek w mòdrëch ruchnach brifczi. Taszã sã zybie na remieniu jak baszka òd szafòwégò zégra. Pòmału pòdnôszô sã nëba czôpczi. W jednym sztóce nodżi robią sã z gùmë...
Gòłô czaszka slépcëje na mie òcznyma kùlama a wëtrëpiałé zãbiska tacą sã w rëszny szczãce. Klekòcą: Lëst òd dochtora Hagensa...

W Żarsczi Seniawie lëdzama nie je do smiéchù. Ni ma robòtë. Pòzamikelë fabriczi. Dëcht tak, jakbë wszëscë mielë namkłé na nã wies...
Równak Niemc, Ginter von Hagens kùpił tuwò szterë mòrdżi zemi razã z bùdinkama pò stôrim POM-ie. Ùdbôł sobie w Seniawie preparowanié lëdzczëch całów...Tegò, co z nas òstnie pò smiercë. Cała òstałë zapisóné w spòsobie. Ginter i jegò karno ùczałëch pómpùje w zëmné miãso swòje preparatë, czëszczi flaczi, żëłë z krwi wësusywô. Mùskùle flëdrama zriwô. Mô czile na to mòdłów. Na tëch „òbrobionëch” człowieczich trupach ùczą sã przińdny dochtorze. Von Hagens rëchtëje téż wëstôwczi, na chtërnëch jak żëwëch pòtkac jidze np.:
trupa grającégò w balã... Taczégò, co mù bëło za cepło w jegò gwôsny skórze- tej jã zjimnął i przewiesył przez rãkã... Białcëskò na drótach z lózym brzechã- drëgą z „pasażérã”... Dwùch zmiartëch na kóńsczim gnôce... Strëcha, na chtërnym sztëczi miãsa stoją jak na jindianie pióropusz... Tuten z mùskã na wiérzkù sedzy nad szachama i mësli prawie, czë rëszëc kòniã, wieżą, laufrã, czë mòże królewą...
A sprôwca tegò wszëtczégò wëzdrzi, jakbë przed sztócëkã zjôdł ùgòtowóną piers swòji matczi i terô nie wié, rzëgnąc czë jesz pòtemac...
Mieszkańcowie pòlsczi wsë mają tôczel. Wpùscëc Niemca? Mòże dô robòtã przë gòtowanim gnôtów, wëcyganim żëłów i „ùprôwianim” zëmnégò miãsa? Czë karowac z SS-mańsczim sënã, chtëren rągô bòsczémù dokazowi?

Pòcwierdzywóm òdbiér lëstu. Gnôcati ze swòją wichlającą sã taszą rëszô na pòsobną szëchtã swòjégò jesz zemsczégò żëwòta...


Tomôsz Fópka,
Żukòwò, 3 strumiannika 2005r., gòdz. 16.03

----------------
"Pòjmë w przódk z kaszëbizną!"- J. Trepczik- www.fopke.pl